დასკვნითი წინასაარჩევნო პროგნოზები
ჩვენი ბოლო პროგნოზებიდან დღემდე, რამდენიმე გამოკითხვის შედეგი გამოქვეყნდა. „ფორმულამ,“ „მთავარმა არხმა“ და „იმედმა“ საზოგადოებას საკუთარი კვლევების შედეგები წარუდგინეს. შესაბამისად, ჩვენი განახლებული პროგნოზები სწორედ ამ მონაცემებს ეყრდნობა. გასათვალისწინებელია, რომ ჩვენს ხელთ არსებული ყველაზე ახალი გამოკითხვის საველე სამუშაოები 25 სექტემბერს დასრულდა, რაც იმას ნიშნავს, რომ ამ თარიღის შემდგომი მოვლენების რეიტინგებზე ეფექტი, მაგალითად - მიხეილ სააკაშვილის მორიგი განცხადება 2 ოქტომბერს საქართველოში დაბრუნებასთან დაკავშირებით, მონაცემებში არაა ასახული.
ჩვენი მონაცემებით, ამ ეტაპზე, „ქართული ოცნება“ პროპორციულ არჩევნებში სავარაუდოდ, 37%-ს მოაგროვებს, „ერთიანი ნაციონალური მოძრაობა“ - 27%-ს, „საქართველოსთვის“ - 9%-ს, ხოლო სხვა პარტიების რეიტინგი წინა პროგნოზის მსგავსად, 5%-ს არ აღემატება.
თუკი დროით ტენდეციებს შევაფასებთ, ვნახავთ, რომ 25 სექტემბრისთვის „ქართული ოცნების“ მხარდაჭერა კლებულობდა, ხოლო „ენმ“-ისა და „საქართველოსთვის“ - იზრდებოდა. თუმცა სავარაუდოდ, მათზე გავლენა ბოლოდროინდელმა მოვლენებმა გარკვეულწილად მაინც მოახდინეს. იქიდან გამომდინარე, რომ განსაკუთრებით სახელისუფლებო პარტიას ამომრჩევლების მობილიზების გაცილებით დიდი რესურსი გააჩნია, რომლის ზომის შეფასება გამოკითხვების მეშვეობით რთულია, სავარაუდოა, რომ „ქართულ ოცნებას“ აქვს შესაძლებლობა, პროგნოზში დაფიქსირებულზე უფრო მეტი ხმა დააგროვოს.
სავარაუდოდ, ეს ჩვენი ბოლო პროგნოზი იქნება, რადგან არჩევნებამდე ერთი დღით ადრე საქართველოში „სიჩუმის დღეა“, თუმცა პროგნოზი შესაძლოა, განახლდეს, თუკი დამატებითი ცვლადები (ინფლაციის, დოლარის კურსის და კორონავირუსის მაჩვენებლები) რადიკალურად შეიცვლება და სხვა გამოკითხვის მონაცემები თუ გახდება საჯაროდ ხელმისაწვდომი.